၂၀၂၀ပြည့်နှစ် မတ်လ ၂၆ရက် (ကြာသပတေးနေ့)
အကောင်းဆုံး ပန်းချီ၊ ပန်းပု အနုပညာလက်ရာပစ္စည်းတွေတိုင်းမှာ လူတွေကို ဆွဲဆောင်နိုင်တဲ့ စိတ်ဝင်စားစရာ နောက်ကြောင်းရာဇဝင်တွေ ရှိပါတယ်။ ဒီနောက်ကြောင်းရာဇ၀င်တွေကို သိနားလည်ခြင်းဟာ အဲဒီ အနုပညာပစ္စည်းတွေရဲ့ လူတွေကိုဆွဲဆောင်နေတဲ့ လျှို့ဝှက်ချက်တွေကို သိဖို့ ပထမခြေလှမ်း ဖြစ်ပါတယ်။ ဒီအစီအစဉ်ကနေ တိုကျိုအမျိုးသားပြတိုက် မှာ ထားရှိတဲ့ ဂျပန်ကိုယ်စားပြု အကောင်းဆုံး အနုပညာလက်ရာ ပစ္စည်းတွေရဲ့ ဇာတ်လမ်းအမျိုးမျိုးကို မိတ်ဆက်တင်ပြရင်း ဒီပစ္စည်းတွေရဲ့ နောက်ကြောင်း ရာဇဝင်တွေကို လေ့လာကြပါမယ်။
၁၈၇၂ခုနှစ်မှာ ဆောက်လုပ်ခဲ့တဲ့ တိုကျိုအမျိုးသားပြတိုက်ဟာ ဂျပန့် ရှေးအကျဆုံး ပြတိုက် ဖြစ်ပါတယ်။ အဲဒီအချိန်တုန်းက ဆင်းရဲနေဆဲ ဖြစ်တဲ့ ဂျပန်ဟာ ခေတ်မီဖွံ့ဖြိုးတိုးတက်တဲ့နိုင်ငံထူထောင်ရာမှာ အရေးပါတဲ့ ဆောင်ရွက်ချက် တစ်ခုအဖြစ် ဒီပြတိုက်ကို ကြိုးပမ်းတည်ထောင်ခဲ့တာ ဖြစ်ပါတယ်။ အဲဒီနောက် အရှေ့တိုင်းနိုင်ငံတွေ၊ အဓိကအားဖြင့် ဂျပန်နိုင်ငံက အနုပညာလက်ရာပစ္စည်းတွေ၊ သမိုင်း၀င် စာရွက်စာတမ်း၊ မှတ်တမ်းတွေနဲ့ ရှေးဟောင်းပစ္စည်းတွေကို စုဆောင်းထိန်းသိမ်းခဲ့တာ နှစ်ပေါင်း ၁၄၀ကျော် ရှိသွားပါပြီ။ အဲဒီပစ္စည်းတွေနဲ့ပတ်သက်တဲ့ လေ့လာမှုတွေ၊ သုတေသနတွေ ကိုလည်း ပြုလုပ်နေပါတယ်။ ဒီပစ္စည်းတွေကို ပြုပြင်ထိန်းသိမ်းမှုတွေလုပ်ပြီး အများပြည်သူကိုလည်း ခင်းကျင်းပြသနေပါတယ်။ တစ်ဖက်မှာလည်း ပညာပေးလုပ်ငန်းတွေကို ဆောင်ရွက်လျက်ရှိပါတယ်။ အခုလက်ရှိမှာ တိုကျိုအမျိုးသားပြတိုက်မှာ ပစ္စည်းပေါင်း တစ်သိန်းတစ်သောင်းကျော်ကို ထိန်းသိမ်းထားရှိပါတယ်။